Улсын наадмаас хойш болсон томоохон барилдаануудад хэн түрүүлж, үзүүрлэв?
Тулгар төрийн 2233, Их Монгол Улсын 818, Үндэсний эрх чөлөө, тусгаар тогтнолоо сэргээн мандуулсны 113, Ардын хувьсгалын 103 жилийн ой, Үндэсний их баяр наадамд Улсын даян аварга Н.Батсуурь түрүүлж, Улсын арслан Б.Орхонбаяр үзүүрлэсэн билээ. Улсын наадмаас хойш Өндөр гэгээний наадам, Говь шанхын хурд тэргүүтэй хэд хэдэн том наадам болжээ.
Говь шанхын хурд - 07.27
Улсын наадмаас хойш хоёр томоохон барилдаан болсны нэг нь Өмнөговь аймаг байгуулагдсаны 93 жил, Батмөнх даян хааны 560 жилийн ой, Говийн бүсийн хурдан морьдын уралдаан Говь шанхын хурд-7 баяр наадам юм.
Өнгөрөгч бямба гарагт болсон уг наадамд Улсын аварга П.Бүрэнтөгс, О.Хангай наран үзүүр түрүү булаалдаж ойрхон газардсан ч О.Хангайн давав. Их шөвөгт Улсын заан Б.Бат-Өлзий, Ц.Одбаяр нар шалгарлаа.
Ламын гэгээн - 07.27
Ламын гэгээний 385 жилийн ой, Бат оршил өргөх ёслол хүндэтгэл, шашин соёлын баяр наадмын Үндэсний бөхийн барилдаан энэ сарын 27-нд Баянхонгор аймагт болов. Уг наадамд Улсын начин Э.Батмагнай түрүүлж, Улсын үнэн зоригт харцага Н.Золбоо үзүүр булаав.
Их шөвөгт Улсын өсөх идэр начин Б.Эрдэнэхүү, Баянхонгор Аймгийн арслан Д.Бямбасүрэн нар шалгарлаа. Дунд шөвөгт Архангай Аймгийн арслан Д.Ням-Очир, Баянхонгор Т.Баттогтох, Б.Түвшинтөгс, Ховд Аймгийн заан Б.Уртнасан нар шалгарлаа.
Говьсүмбэр аймгийн баяр наадам - 07.26
Говьсүмбэр аймаг байгуулагдсаны түүхт 30 жил, Боржигин 2024, төвийн бүсийн хурд наадамд Улсын арслан Ц.Содномдорж, Р.Пүрэвдагва нараар манлайлуулсан 256 бөх хүч үзсэнээс Хэнтий аймгийн Өмнөдэлгэр сумын харьяат Аймгийн арслан Д.Алтанцоож түрүүлж "Хурц" чимэг нэмлээ.
Үзүүр бөхөөр Улсын заан С.Сүхбат, их шөвөгт Улсын харцага Ш.Пүрэвгарди, Завхан аймгийн Аймгийн харцага Б.Ганбаяр нар шалгарлаа.
Дорноговь аймгийн баяр наадам - 07.27
Дорноговь аймгийн 93 жилийн ойн баяр наадамд Улсын гарди Ш.Жаргалсайхан, Улсын заан Ц.Баярсайхан, Б.Серик нараар манлайлуулсан 128 бөх хүч сорив.
Уг наадамд Дорноговь аймгийн Айраг сумын харьяат Аймгийн начин С.Занданхүү түрүүлж "Аймгийн арслан" цолны болзол хангасан бол Дорнговь аймгийн Сайхандулаан сумын харьяат Аймгийн заан Б.Түвшинтулга үзүүр булаалаа.
Их шөвөгт Увс аймгийн Хяргас сумын заан Х.Бумбаяр, Архангай аймгийн Хайрхан сумын заан Л.Агваансамдан нар шалгарч Аймгийн харцага цолны болзол хангав.
Л.Баяр
https://www.24tsag.mn/a/229868